112,8 kíló!
Það eru mínus 1,6 kíló
Ég er mjög ánægð með þennan árangur á tæpri viku, vigtaði mig á föstudaginn síðasta.

Ég er ekki nettengd núna svo ég mun líklega skrifa inn á bloggið mitt vikulega, þá um helgar og svo meira ef ég get. Þess vegna ætla ég að hafa vigtunina á föstudögum í stað mánudaga... þá get ég komið með ferskar tölur um helgar

Ég fer rólega af stað. Tek eitt skref í einu. Fyrstu vikuna ætlaði ég að nota til að venja mig af sælgæti og gosi. Ég hef ekkert borðað sælgæti né drukkið gos þessa viku... NEMA... ég fór í IKEA í vikunni og við enduðum á því að borða á matstaðnum þar og ég fékk mér gos... alveg ómeðvitað, örugglega bara af vana. Ég fattaði það þegar ég var hálfnuð með annað glasið. Ég fékk smá sjokk en komst yfir það! Engu öðru hef ég breytt þessa viku. Þessa og næstu viku ætla ég líka að nota til að klára matinn sem ég á sem ég ætla ekki að nota í nýja lífsstílnum mínum. Eins og til dæmis hvítt pasta, hvítt hveiti, kartöflumús, pakkamat og allskonar svoleiðis. Ég tími bara ekki að henda því. Ég á heldur ekki pening svona rétt fyrir mánaðarmót til að endurnýja allan mat í skápunum hjá mér!

Það erfiðasta sem ég finn núna þegar ég er hætt að borða nammi og drekka gos, eru kvöldin. Ekki öll kvöld, en kvöldin sem mig hlakkar til að henda mér í sófann, horfa á góða þætti í sjónvarpinu og háma í mig nammi og gos! En svo er ekkert nammi og ekkert gos svo...

Næstu viku ætla ég að nota til að koma reglu á matartímana og minnka skammtana... eða sem sagt venja mig á að fá mér einn skammt! Og þar sem ég hreyfi mig lítið þá ætla ég að bæta við göngutúrum í næstu viku. Ætla í hálftíma göngutúr á hverjum degi, má vera lengri en að minnsta kosti hálftími.

Ég vil þakka ykkur öllum sem lesið bloggið mitt, sérstaklega þeim sem kommenta hjá mér. Það er alveg ótrúlegur stuðningur. Nokkrum sinnum í vikunni langaði mig mjög mikið í nammi. Var til dæmis stödd í búð fyrir framan nammihillurnar og langaði að ná mér í eitt súkkulaðistykki. Og þar sem ég hef svo litla sjálfstjórn þá hefði ég líklega fengið mér þetta súkkulaði... ef ég hefði ekki ykkur. Mér var hugsað til bloggsíðunar og ykkar sem lesið og ef til vill er einhver sem tekur mig til fyrirmyndar og ég ætla sko ekki að fara að eyðileggja það! Svo það er mun meiri stuðningur í að halda þessa litlu og einföldu bloggsíðu mína en mig grunaði

Takk fyrir stuðninginn og megi hann halda lengi áfram

Ég tók svona "fyrir myndir" af mér og þegar ég er komin niður í 99 kíló þá ætla ég að setja þær hér inn. Það er fyrsti áfanginn.

Þetta verður ekki lengra í þetta sinn... bíðið bara spennt eftir blogginu næstu helgi!

Jæja, þá er þetta allt að smella saman. Skipurlagið sko. Fyrir svona ferðalag þarf maður að skipurleggja sig vel... ekki of vel en hæfilega vel til að taka ekki rangar ákvarðanir í fljótfærni. Alveg eins og ef maður væri að fara í ferðalag út á land. Maður ákveður áfangastað. Svo fær maður sér kort og finnur út leiðina sem maður vill fara og ef það eru margar leiðir verður maður að velja. Þetta er nauðsynlegt til að lenda ekki í því að taka ranga beygju og enda á stað sem maður vill ekki vera á.Það er að sjálfsögðu líka hægt að hafa ferðalagið tilviljunarkennt og lenda á óvæntum stöðum... en það er ekki það sem ég er að gera núna. Ég á mér markmið. Og ég sé þetta markmið fyrir mér. Og ég mun ná þessu markmiði innan skamms

Ég ætla að byrja á morgun, mánudag. Úff... eins og er hlakkar mig ekkert rosalega til. Ég er nefninlega algjör matarfíkill. Ég borða þegar mér líður illa. Ég borða þegar ég er einmana... þá helst súkkulaði. Ég held að það sé satt sem sagt er um súkkulaði. Ég fæ sjúklega þörf fyrir súkkulaði þegar ég er einmana! Ég borða þegar mér leiðist og ég hef ekkert að gera. Ég borða þegar mér leiðist og ég hef helling að gera en nenni því ekki. Ég borða þegar ég veit ekki hvað ég á að gera, ef mig langar ekki til að gera neitt sérstakt. Ég borða af vana... fyrir framan sjónvarpið, við tölvuna, þegar ég les... Og ég á erfitt með að gera hluti án þess að borða í leiðinni... eins og að horfa á sjónvarpið, vera í tölvunni, lesa bók... alltaf nartandi í eitthvað óhollt. Þetta er eins konar vítahringur... að geta ekki borðað nema hafa eitthvað að gera á meðan og geta ekki gert neitt nema narta í eitthvað með! Og út úr þessu þarf ég að komast... því þetta sem ég er endalaust borðandi er eitthvað allt annað en hollt! Svo nei... mig hlakkar ekki til að byrja!

En ég ætla, það er engin spurning. Ég hef nánast enga sjálfstjórn. Ef mig langar í eitthvað fæ ég mér það... svo framarlega að ég eigi pening til að kaupa það. Og það er einmitt stór aukaverkun af þessum frábæra breytta lífstíl... ég mun eignast meiri pening! Ekki kannski eignast hann heldur mun ég ekki eyða honum í vitlaeysu og þar af leiðandi eiga hann. Svo þetta er sparnaður í leiðinni

Á morgnana ætla ég að fá mér morgunmat sem til skiptis verður AB-mjólk með heimatilbúnu múslí og gróft fjölkorna brauð með áleggi/osti og grænmeti/ávöxtum. Og taka lýsi. Drekka svo mikið vatn yfir daginn. Um tvö glös með hverri máltíð. Hvert glas er um tvöhundruð og fimmtíu millilítrar svo yfir daginn mun ég þá drekka tvo og hálfan til þrjá lítra af vatni... sem er mjög gott. Meira ef ég hreyfi mig mikið, drekk þá vatn með hreyfingunni.

Í miðmorgunmat ætla ég að borða ýmist ávöxt, hrökkbrauð með osti og grænmeti eða gróft fjölkorna brauð með áleggi/osti og grænmeti/ávöxtum.

Í hádeginu ætla ég svo að borða kjöt, fisk, pasta og hvað það sem fólk hefur venjulega í kvöldmat. Þá eru komnar tvær til þrjár þurrar kolvetnismáltíðir og allar fyrri part dagsins

Í síðdegismat verður hollt snakk... sem eru ýmsir ávextir (ekki banani, hann verður fyrri hlutan) og grænmeti, ber og hnetur. Ætli þetta verði ekki "nammitími" dagsins. Við erum gerð til að sækjast í sætindi... til þess að frummennirnir myndu leita sér ávaxta og berja og þannig fá ýmis nauðsynleg næringarefni. Svo við þurfum sætuefnin okkar á hvejum degi... ber og ávexi og þess háttar  Gæti líka verið gott að búa sér til jammý sjeik úr til dæmis skyri og berjum.

Kvöldmaturinn verður svo ýmist egg og grænmeti, allskonar salöt; til dæmis með kjúkling, skyr og ávextir, grænmetissúpa og þess háttar léttmeti. Ef þið eigið góðar uppskriftir af léttum máltíðum... endilega deilið. Og líka ef þið hafið fleiri gómsætar hugmyndir í máltíðarnar mínar

Ég ætla að reyna að borða ekkert eftir kvöldmat en ef ég verð alveg að farast þá ætla ég að fá mér ávöxt (gott að frysta til dæmis melónu eða vínber og fá sér "ís") eða grænmetissnakk. Einstaka sinnum búa til æðislega ídýfu fyrir grænmetið  Gott ráð er að bursta tennurnar fljótlega eftir kvöldmat eða bara ef manni fer að langa í eitthvað... þá eru minni líkur á að maður fái sér eitthvað. Tyggjó virkar örugglega líka.

Ég ætla að gera ítarlegan matseðil, gera svo innkaupalista eftir honum, versla nákvæmlega eftir innkaupalistanum og eiga enga freistandi óhollustu heima. Fara svo bara sjaldan að versla, kannski einu sinni í viku og þurfa ekkert að "skreppa út í búð"... við vitum nefninlega hvernig það endar, er það ekki?!? Já, og auðvitað að fara SÖDD að versla.

Ýmis smáráð:

Nota litla matardiska, þá finnst mér ég vera að fá meiri mat.

Borða rólega... gefa heilanum tíma til að meta hvort hann sé orðinn saddur. Ef þú hefur ekki tamið þér áður að borða rólega er gott ráð að forskera ekki matinn og leggja hnífapörin niður á meðan þú tyggur

Krydda matinn vel... ég veit ekki alveg af hverju en það er eins og maður verið fyrr saddur af sterkum mat og borði þess vegna minna.

Eiga niðurskorna ávexti og grænmeti tilbúið inn í ísskáp ef skyndileg nartlöngun lætur á sér bera (ætla að gera það fyrir börnin mín, gott fyrir þau þegar þau koma heim úr skólanum)

Hafa tilbúnar uppástungur um eitthvað að gera ef mér fer að leiðast (er sko í fæðingarorlofi svo ég hef nægan tíma til að láta mér leiðast)!

Sofa nóg... sem er ekkert smáráð heldur bara mjög nauðsynlegt.



Endilega segið mér frá ykkar smáráðum